بقلم / خالد الترامسي
بلا سياسة بلا وجع دماغ ، بقي ينفع يا جماعة يبقي عندنا الأقصر وأسوان والمتحف المصري والقبطي والإسلامي ، والقلعة ، والشرم والغردقة والساحل الشمالي ، والنيل ، والبلد مفيهاش سياحة ، دي مصر لوحدها فيها ثلثي أثار العالم ، دا غير السياحة الشاطئية ، وسياحة المؤتمرات ، والسياحة العلاجية
هو ممكن يبقي في سياحة والدنيا تنتعش والعيال الغلابة تشتغل ويتجوزوا بس إزاي وإحنا القائمين علي السياحة في البلد عاوزين يترقع لهم ، والله أنا لو مكان السيسي لأجيب شوية خرزان من عند الواد عمر البشير ” عادي عادي متحطوش في بالكوا يعني كان هيقرالي وحتي لو قرأ لي يعني أنا كنت هروح له السودان ” المهم ويجيب كل اللي المسؤولين عن السياحة ، وأولهم ،،،،،،،، وينزل فوقهم ضرب لحد ما جسمهم يشلب دم وياريت يتوصي بالأمبولة حبتين ، دول مبيختشوش ، قال الواحد عشان ياخد مراتو وحتة البنت إللي عندها ست سنين يصرفلوا أربعة أو خمسة ألاف جنيه وفإية في ثلاثة أيام ، في حين إن الواحد لو راح تركيا الموكوسة ولا اليونان وبالطيران وإيه أسبوع كامل ميتكلفش أربع ألاف جنيه ، طيب ينفع كدة ، طيب لما الأجنبي بيجي مصر إللي هما أساسا مبيعرفوش يجيبوه ، ياخد الليلة السياحية stars 5 ب ٩ دولار ، ويقعدوا يتحايلوا ويتذللوا لهم ، والأجانب حاطين رجل علي رجل .
المسؤول المصري : الليلة فول بورد ب ١١ دولار .
الأجنبي : أيه .
المسؤول المصري: طيب ب ٩ دولار .
الأجنبي : هه.
المسؤول المصري : وعلي الطلاق ب ٧ دولار يا عم الحاج وعليهم كام رحلة مجانية .
يا عم المسؤول هو أساسا مسمعكش وأنت قاعد عمال تنزل في السعر زي الطربش ينفع كده ، طيب تعالي قولي بس العرض ده وأنا هوافق علي طول ، وهقولك إنت متأكد من الكلام ده ، والله لظقطتك وخليك ماشي فشتك عايمة .
شوفوا الدول المحترمة أهم حاجة عندهم يشغلوا الطيران ، وأحنا هنا مش عارفين نشغل الكام غرفة ، عشان إستغلالية أولاد التيييييييييييت ، طيب يا جماعة ده لحساب مين ولا إنتوا بتخدوا عمولة من بره عشان تجيبوا درفها ، طيب أنا بقي بتهمكوا بالعمالة والعمل علي تدمير قطاع السياحة والإقتصاد القومي ، وهعمل حملة ضدكوا وههيج الدنيا كلها عليكوا وأول واحد ههيجوا عليكوا الريس ، ولا الريس هيشتغل كل حاجة في البلد .
طيب أنا هدشن ضدكوا حملة وهيكون إسمها ” أنا مصري عاوز ليلة سياحية بأسعار الأجنبي ” خلي الناس الغلابة تتبسط ، وأقل من سعر الأجانب كمان ، إحنا مش لنا حق في البلد دي ، هي مش الأثار ملكنا والنيل ملكنا والمتاحف ، أنتوا إللي ليكوا عندنا هي الغرف شوفوا الأجانب بيدفعوا كام وإحنا ندفع زيهم ، ولا هما علي راسهم ريشة ، أنا المفروض أتميز ، وعن الحجة بتاعتكوا بتاعة المحافظة علي مستوي الغرفة ، متقلقوش هنرشهالكوا فنيك ، وهجيب البت نحمدو تسيأ التويلت والغرفة بالديتول ، أظن مش حارمكوا من حاجة أهه ، يلي بقي يا شطار ، إعملوا بقي عروض محترمة ، وسيبوكوا من العروض الأونطة بتاعتكوا إللي الهدف منها ” سياسة جر الرجلين ” ونفاجئ بالخوابير من كل طالعة من مكان ، وبعد كدة نلعن سلسفين أهلكوا ، بقي ينفع كدة .
عموما لموا الدور وأشتغلو بما يرضي الله ، والله إحنا مش محتاجين إكتشاف أبار بترول ولا غاز ولا زراعة ولا جباية ضرايب ولا بيع أراضي إسكان المتر ب ٢٨٠٠ جنيه غاية ٤٨٠٠ جنيه للمواطنين ،،،،،،،،،،،،،،،،،،، إحنا محتاجين ننشط السياحة الداخلية والخارجية أيضا والدنيا هتبقي زي الفل بس أنا شايف إن القائمين علي الأمر ” المعنيين ” لإما يتفرنتوا لإما يغوروا وعليهم سلام الله ، المشرحة مش ناقصة فئران .
